27/7 共鳴歌單:  

1. 誰能明白我? - 林子祥

只屬幾百人的孤單

我想當大家心情唔好時, 可能都會有句口頭禪, 就是: 你都唔明我

其實, 有冇想過? 香港NMO病人好有資格講呢句, 因為我們在香港有幾多個同路人? 攞盡都只得幾百人明白. 在NMOHK協會成立前大家都不認識大家, 要搵個NMO病友非常難, 感覺好孤單. 有誰明白我們感受?

2. 莫再悲 - 林子祥

NMO改變我媽, 亦改變我

今天雖然媽都是唔可以自理, 6年前未病發的媽媽已經成過去, 唔會再返來, 我覺得她近年笑多左, 開心左, 仲有時講爛gag

事情總會過去, 人生風浪總有平靜之時, 我所講的不是外在NMO對我們的摧殘, 正如我媽的傷殘其實都冇完全康復, 都仍然不可自理, 但心中感受的苦楚,悲傷…總會過去.

3. 問我 - 陳麗斯

我仍是我

讓我實在告訴大家, NMO其實只是一個罕有病咁簡單, 我們都不是殺人犯, 通輯犯. 我們冇做錯什麼,我們無需有羞恥感,

在此點首: <問我> 給大家.

無論歷盡幾許風波, 我仍然能夠, 講一聲, 我係我

正如就算我們中左NMO, 因NMO而失去什麼, 我就是我, 我裡面的真我是冇變. 我仍然能夠, 講一聲, 我係我

4. 一雙手 - 林奕匡

用上半身去過好下半生

的確我們每人都有一雙手, 但PEGGY似乎只剩一雙手, 這雙手可以為她創業, 可以贏回自尊, 可以搵到方向, 可以的仲有好多… 你靠你的一雙手, 又成就了什麼?

在這年間, 虎媽病情越來越差, NMO開始攻擊她的視力, 左眼已睇唔到了, 讓我們大家在此誠心祝福她搵到有效藥物, 控制病情, 仍然做自己想做的事.

5. 喝采 - 陳百強

行得幾慢都要行

他要雙手揸柺杖才行到路, 咁若落雨他又怎返工? 唔通他唔擔遮? 咁落大雨又點? 他又生得好高好瘦, 其實真是好易跌倒, 點降他咁勤力仲堅持返工? 其實他可以揀唔做野的, 但是行得幾慢他仍要行. 回想他應該是廿幾歲就中NMO, 那時應該讀完書不久, 乜都未試過, 連飛坐機去旅行只坐過一次… 

NMO打斷了他一切人生計劃, 他好多野都未試過, 我除了陪他行這段路外, 又可做什麼? 在此想點首歌比他 <喝采>, 雖然每一步都是他自己踏出, 但想在他旁為他鼓舞打氣, 以他為榮

6. 世上只有 - 容祖兒

NMO母親的偉大

NMO每次病發可以好凌厲, 不及早治療是可以永久失明和癱瘓, NMO媽媽因著BB安危而犧牲自己, 不先去想自己, 其實真是好偉大. 

愛有好多種, 但相信肯去犧牲自己去成就對方, 這愛令人動容和敬佩.

在此送首歌比所有NMO媽媽 <世上只有>, 無論你們作什麼決定, 最後有什麼結果? BB都知道妳愛他, 你對他的愛無容致疑, 不需怪責自己, 不需懷疑這愛, 這愛, 是不可替代.

7. 強 - 郭富城

痛得死去活來

好多NMO病人不只身體傷殘, 亦每天承受嚴重神經痛, 就算食多種止痛藥都不能幫到, 痛到唔可以安睡, 痛到唔可以返工, 痛到想死, 是真正想死, 好多人是痛到曾經想自殺, 有D幸運的是痛一兩年, 有些痛了十幾年都仍痛, 面對沒有盡頭的痛, 其實真是好絕望, 所以每一個仍努力生存抵受痛楚的NMO病人都是好強, 比起好多外表看來的強人更強

8. 前程錦繡 - 羅文

只是急轉彎, 不是絕路

我們不是冇晒前程, 我們只是過另一種前程

小小苦楚等於激勵, 等於苦海翻細浪, 雖然NMO不只是小小苦楚, NMO的苦好大好痛, 甚至大到你無法承受, 大到你以為是你的全部, 但再想想, 或者NMO不是你人生的海, 只是海中的浪, 唔係你人生的全部, 只是人生中其中之一個風浪