有事問, 有事問!
14/4/2022 - 我已經患了NMO,我怕我的BB會遺傳我的病,若真是,這樣我家就有兩個長期病人
你好啊，我已經係兩個小朋友既媽媽，當初我都係生左大仔7個月之後先病發，個陣我同你既想法一樣，同樣都係怕自已個病會遺傳到俾小朋友，如果真有遺傳，所有既重擔就會去哂我先生身上，我自己都好唔想見到呢個情況。
不過我自己都問過醫生，佢都話遺傳機會不大。我自己都半信半疑，都上網睇過好多文章，又真係唔見話會遺傳。當然你最好問返自已既主診醫生會比較好。
不過touchwood，我而家兩個小朋友暫時都是健健康康，希望有我呢個活生生既例子俾你做參考。
Ceci
有事問, 有事問!
10/4/2022 - 我是NMO病人,近年病情穩定,剛剛知道自己意外有孕,不在計劃之內,心情既喜又擔心, 面對生與不生的抉擇, 不知應怎面對?
首先恭喜你啊~ 回想當初我的心情同你都是一樣。
另外我想知道你而家有bb幾耐? 同埋你而家既身體狀況係點樣? 有冇同你屋企人同埋主診醫生講啊?
生或唔生呢個決定首先都係跟先生商量左先，如果自已一個做決定會有好大壓力架。 如果同先生商量左都係決定要既，再諮詢醫生既意見會比較好。唔需要擔心點樣去面對，因為屋企人永遠都會給予你最大既支持，包括埋我啊。
Ceci
有事問, 有事問!
17/2/2022 - NMO病人懷孕與生BB，比起普通人來說有冇分別?懷孕期間會辛苦D? 會較其他人累嗎?”
其實在我自己未病發前，我都以為自已係一個普通人，所以我覺得第一胎懷孕對我來講都係輕鬆既，一來後生d，二來身體個陣仲未有任何受損或者殘缺。到我有左第二胎既時侯，因為之前幾年內我都復發過幾次，有d神經線已經受損了，所以會有神經痛同埋會長期腳痺，所以到我自己陀第二胎時就相對攰d同辛苦d，不過其實辛苦都只係幾個月既事，只係去到懷孕後期，bb會越黎越重，那時有機會腳又痺多d，腰背又痛多少少咁大把。
不過我諗都要因應自己本身身體個別受損狀況而定，未必所有NMO既病人有bb都辛苦既。
Ceci
有事問, 有事問!
23/12/2021 - 雖然有人認為生BB是女人的天職, 但唔生又有問題嗎? 唔生BB真是人生遺憾嗎?
我自己又唔會諗生BB係唔係女人既天職，只係天生男人同女人既身體結構唔同啫，如果我老公可以代我生，我一定會叫佢生呀，哈哈! 所以我覺得冇話絕對既對與錯，好與壞，我覺得生同唔生，只不過係人生中令自己有唔同既體驗。
如果選擇生既話，屋企無疑會多左個新成員，自己又會擔任左唔同既角色，多左個新既身份，所有嘅嘢都會有所轉變，例如屋企開支會大左，你開始會以bb為中心，買俾bb既嘢多過買俾自己，又可能會因為自己照顧bb既方法同另一伴有出入而嗌交，不過我唔係想講生bb係壞處多過好處，咁始終屋企多個人是會熱鬧d既。不過有時我自己都會試吓從另一方面諗，如果冇生bb都唔係唔好啊! 自己一份人工鐘意買乜就買乜，鐘意幾時約朋友食飯就隨時約都得，幾時想去旅行就去旅行。
所以生同唔生我覺得都係會有佢既好處，各有各好。就算唔生都唔洗俾太大壓力自己啊，因為妳的人生除了BB仍有好多野!
Ceci
有事問, 有事問!
16/11/2021 - 聽說懷孕時要停藥,我指是防止NMO復發的藥,我好驚在這些日子會復發,想 到此就好影響心情, 最近還令我晚晚失眠, 日日怕會復發, BB未出世前這幾個 月我怎捱?
其實當初我自己有左bb，每一日都係擔驚受怕，一來擔心bb既發育，二來就係怕個病唔知道幾時會病發，個陣每日承受既壓力係身邊既人都唔會理解到
不過與其每日咁擔心，媽媽你自己既心情都會影響到bb， bb會知道你唔開心架。不如搵方法放鬆下心情或者分散下自己既注意力，例如bb就黎出世，可以慢慢佈置下佢間房或者佢張床仔啊，而家bb需要用既野都有好 多架，身體許可既話得閒去行下bb用品鋪都好好架，見到bb仔嘢我包你心情會開心哂。
另外因為我自己本身係打緊rituximab，懷孕期間醫生都suggest 我生完bb之後先再繼續打返，所以我唔係好清楚係唔係所有防止nmo復發既藥都唔食得，最好都係問下自己個醫生會比較好，同埋始終醫生先最了解你身體情況。
陀bb時心情又驚又喜, 好期盼, 但又擔心，尤其是我們nmo病人更多一層憂慮，這些我都曾試過。不過我都可以平穩心情安然渡過，相信妳都可以的，嘗試做妳情緒的主人, 加油啊!
Ceci