Search
  • Peggy

創業前要考慮的...

Updated: Aug 14, 2021

[我有用3]


今日不如講講我創業開始的準備(其實沒有太多),大家有冇興趣睇呢?

1. 創業的開始 - 竟然是養貓 其實我創業的開始很簡單、單純,無端端就入了行。 就是當時我開始養貓,養貓就想為她左買右買,然後就想與其只買,不如也賣。 剛好那時我因病辭了職,在家無所事事。 而且,我識日文,那時候我們買的、打算賣的都是日本的貓產品,我識日文就啱了,又應用到,又可以發揮所長。 有任何一些興趣或強項,應用到工作上應該唔錯呀(唔一定要創業,打佢工都得。)

2. 衡量自己能力 - 我有什麼才能? 開始做之前,我要先想想自己是否有足夠能力去做。 那時候,我還未癱,但腳始終唔太靈活,做事還是有好多阻滯。所以要勞動的工作,好彩有家姐代勞。 而且,食了藥,加上NMO本身,不時都好攰、好眼瞓的。 另外,因為我腳唔可以長時間唔郁的,腰又沒力,所以我用唔到Notebook,更莫論用電腦了,我只能用手機,足夠嗎? 視力又唔知道可以撐多久(當時未有問題)。 溝通、思考能力都要考慮(因為我腦部都發炎的),我足以同客聯絡嗎?不過好彩的是,我腦筋沒有問題(連醫生都覺得神奇),所以覺得還好。 最後,決定試試吧,唔試又怎麼知。做得多久就多久,多少就多少。 你以為的問題,可能不是大問題,病情其實可能不太嚴重呢! 可能不夠常人好,但夠用就行! 3. 抗逆指數 - 我捱得苦嗎? 那時,我最驚的是會唔會有客講說話唔好聽,影響我情緒呢?始終我們的病NMO,維持情緒好重要,要時刻保持好心情。我怕萬一有客講說話唔好聽,會影響情緒。 結果,好好彩地,大部分客戶講說話都好好、有禮貌、客氣。有些甚至關心我、鼓勵我,好感動。

你有沒有捱苦的心理準備? 每人的死穴唔同,有些人唔受得身體勞苦,有些人則唔受得氣,你呢? 不要開始了才知自己原來好多事都唔受得

4. 衡量市場需要 – 人家需要嗎?

要想想大家是否需要呢?市場競爭大嗎? 那時,我先諗諗,當時大家都不太多/懶得自己上網買東西,即時願意,都唔識日文做唔到。 而我識日文,我做到我識,這個是我的最大強項。 而當時競爭唔算太大(老實講,現在競爭大了好多,好多同業者),唔算好多人做這行。 若你想過了,有得做的! 咁或者是時候可以入行了


5. 對市場的認識 - 我懂這個市場嗎? 當時,只是單純地想,還好我一直有留意日本的東西;即使未養貓時,已經有留意貓的東西。 當然,也有自己唔識的東西,那就學吧! 更慶幸的是,我同家姐的品味都差唔多),我睇中的東西,她都鍾意;她懂得市場需要的東西,我都同意。幾好!有志同道合的同伴一齊做事,都幾好。

如果你要創業的市場是你一點都不認識,這不如先做少少功課,去認識去了解去培養對此市場的觸覺,就如跟人結婚前你都先要好好拍拖,不是盲婚啞嫁呢! 6. 資金準備 - 有沒有錢呢? 跟住我要想有沒有錢。始終營運一個網店,要錢吧? 但原來Facebook開一個Page唔洗錢的,而設計版面,我都是自己做的。你話識唔識?完全唔識,都是一路做、不斷學、試做的(現在還不斷學習中)。 那時就由最簡單開始,不賣廣告,基本上零成本開業(現在唔同,有Facebook, Instagram, MeWe, 網頁,要錢的)。 其實開始都算簡單的,邊個都得、任何人都得。你何不以試用一些免費網上工具作為開始? 有部智能手機已可開始,就算最後唔玩都沒有什麼損失!

7. 病況 – 你的身體狀況穩定嗎? 因為我的病情較反複、唔穩定,我都擔心如果做著做著,我突然⋯⋯大吉利事,即使不是,突然要入院,店舖點呢? 我擔心、我憂慮。 你會唔會要經常出入醫院?唉,有我們這個病就是這樣

但這又如何? 除非你真是一點也不能動,不然,請去發掘你仍可做的事,把你可做到的繼續發展,這可能成為日後的謀生本錢,不要高估自己的能力,但同時都不要輕看你小小的力量,若出名的音樂家貝多芬一生都飽受耳聾折磨,這樣大家都不要只看自己缺乏的東西 講了這麼久,結論還不是當初我甚麼都唔知道、唔識,亂衝亂撞試試吧!邊個知,點知這就試了6年幾。 我們NMO的人,雖然失去了好多,但都沒甚麼可輸的,其實沒甚麼好怕!

或者,試吓試吓,說不定你就找到下半生要發奮的方向

在此我先祝你不放棄,不卻步,肯捱苦,你的成功是屬於你自己!

56 views0 comments

Recent Posts

See All